Oficina Atención ó Paciente no Hospital Materno Infantil da Coruña

Solicitude feita o 30 de Xullo de 2014 ante a Dirección Provincial do Sergas da Coruña, esixindo a reapertura da oficina de atención ó paciente no Hospital Materno Infantil da Coruña.
Ata o de agora o SERGAS non contestou. O que piden os cidadáns, de momento, e unha vez mais, parece que non entra dentro das prioridades dos nosos gobernantes.

Tras 9 meses de espera, a Subdirección de Atención ao Paciente e Calidade, da Xerencia de Xestión Integrada do CHUAC, remítenos esta contestación que consideramos relevante, tanto para os usuarios que acoden ao Hospital Materno Infantil, coma para os profesionais de tódolos centros sanitarios.

COMUNICADO trala entrevista coa Subdirectora de Atención ao Paciente e Calidade da Xerencia de Xestión Integrada do CHUAC:

Tras recibir a carta da Subdirección de Atención ao Paciente e Calidade, que se pode ver sobre estas liñas , pola petición de reapertura da oficina de atención ao doente no Hospoital Materno Infantil da Coruña, e na que se nos indica que pódese presentar queixas ou suxestións en calquera centro de saúde, decidimos comprobar a información e acudir ao Hospital Materno Infantil e ao Hospital Marítimo de Oza.

O luns día 27 de Abril fomos ao Hospital Materno Infantil cunha doente que quixo presentar unha queixa no seu momento e non poido facelo, e comprobar si a situación mudara. Nada mas chegar ao mostrador de entrada, nos dixeron que tíñamos que ir ao HUAC. Logo acudimos, según nos indicaron, á Supervisora de Oncoloxía, xa que esta doente está a tratamento alí, e comentounos que ela recollía o que lle entregaran, pero que descoñecía a devandita norma, e si se estaban a recoller ou non as queixas.

O Martes día 28 decidimos falar coa Secretaría de Dirección e coa Xefa de Admisión. Esta última confirmounos que eles non recollían reclamacións, que o lugar para presentalas era o HUAC, e perante a información que figuraba na carta da Subdirección de Atención ao Paciente e Calidade, nos dixo que a descoñecía e que teríamos que aclaralo coa Subdirectora.

Acto seguido fomos á Secretaría de Dirección do mesmo Hospital, e alí nos dixeron que sí coñecían a información dende facía moi pouco tempo, e que sí se recollían. Ao comentarlle que non se están a recoller, e que minutos antes o persoal da entrada nos dixera que tiñamos que ir ao HUAC, quedouse un tanto sorprendida.

Seguidamente fomos ao Hospital Marítimo de Oza a facer a mesma comprobación. No mostrador da entrada xa nos dixeron que tíñamos que ir ao HUAC. Despois acudimos á Secretaría de Dirección e comentounos que sí se recollían as queixas, e que no mostrador tamén se facía. Ao comentarlle que non era así, estrañouse e dixo que ela estaba disposta a recoller todas as que se lle presentaran.

Tras estas contradicións decidimos acudir a falar coa Subdirectora de Atención ao Paciente e Calidade.

Aproveitamos a ocasión para renovar a petición de reapertura da oficina de atención ao doente en tódolos centros sanitarios onde non os haxa, pero esta vez acompañada de preto de 300 firmas de doentes, familiares e cidadáns que recollemos nos últimos días, tras recibir a contestación da subdirección.

Reiteramos a petición, porque non é suficiente que alguén recolla as queixas. As persoas maiores que acoden ao Hospital Materno, que son moitas, necesitan asesoramento sobre moitos detalles, e incluso axuda para cubrir o impreso aclarándolles tódalas posibilidades.

A Doctora Olveira mostrouse moi receptiva ás nosas peticións, recalcando que o seu obxectivo era el de mellorar este servizo ao usuario.

Agradeceu a información, subliñando que solventaría canto antes os desaxustes de información que actualmente existen no Hospital Materno Infantil e no Marítimo de Oza, no tocante á recepción de queixas ou suxestións.

Reiterámoslle que o noso obxectivo é a mellora de medios e persoal na sanidade pública, xa que é o único xeito de que a poboación mais desfavorecida teña acceso a unha sanidade de calidade, e que as oficinas de atención ao usuario, son unha ferramenta básica para conquerir este obxectivo.

Esta coordinadora non cesará ata conquerir o obxectivo dunha sanidade pública, gratuíta, universal e de calidade.